á ferð og flugi

föstudagskvöldið mitt

2009-11-06T23:38:00.002Z

Frétti um daginn að það væru jafnvel fleirri en 2 sem lesa. Hégómin hefur knúið mig til skrifta en hef lítið að segja að verða miðnætti á föstudagskvöldi. Það hefðu nú reyndar einhverntíman þótt fréttir að ég gæti með naumindum haldið mér vakandi fram yfir miðnætti og væri komin á fætur fyrir 9 allar helgar. Dagskrá helgarinar er líka frábrugðin þéttbýlishelgardagskrá; sund, klassískir tríó tónleikar, sunnudagaskóli, lúðrasveitartónleikar og matarbingó. Inní þetta fléttast kannski kökubakstur fyrir sóknarnefndina og heimsókn til ættingja. Að mörgu leiti á þetta ágætlega við mig en ég hlakka svakalega til að geta fengið mér þó ekki nema almennilegan kaffibolla á almannafæri við og við.
Barnið kallar, sefur illa...

Hégómi

2009-07-26T01:56:00.002Z

Í dag var ég beðin um að vera duglegri að blogga. Ég upplýsti hégóma minn og sagðist ekki nenna að blogga ef það væri ekki kommentað og fékk þá að heyra:
þetta er bara sama pólisía og hjá Reykjavíkurborg.
ég: ha, blogg pólisía.
Hin: nei í samgöngumálum.
ég: ha.
hin: já, engar almenningssamgöngur af því engin notar þær, það verða að vera almenningsamgöngur svo einhver geti notað þær.
ég: jaá, ég er eiginlega alveg með sömu pólisíu og Reykavíkurborg... hummm

ég núna: ekki vil ég vera eins og Reykavíkurborg, best að blogga allavega um þetta, ég sé svo til hvaða stefu ég tek í framhaldinu. Verð að skoða þetta með stefnumótunina.

Verðandi amma

2009-05-12T18:30:00.002Z

Hann Mosi minn sleit barnskónnum uppúr áramótunum og fór að eltast við læðurnar í þorpinu. Um daginn sást hann ekki nema endrum og eins þegar hann kom úrvinda heim, borðaði vel og svaf svo þar til hann hafði aftur orku til að stökkva út. Nú er svo komið að hann er sterklega grunaður um að vera búinn að gera í það minnsta tvær læðurnar kettlingafullar og styttist í got hjá þeim. M0si hefur hinsvegar verið í rólegri kantinum undanfarið og í raun svo rólegur að ég hef haft af honum dálitlar áhyggjur.
Kristínu Björgu var tíðrætt um tíma um litlu systur sína sem hún sagði að ætti heima í Reykjavík. Núna á hún von á svona sirka 5-10 litlum fósturbræðrabörnum, það hlýtur að létta af mér pressuna fram eftir sumri :)

Fyrir ykkur sem lesið, Heiða og Sverrir :) þá er ég á suðurleið um helgina og verð í viku, það væri gaman að hitta á ykkur.

og fyrir Heiðu á meðan ég man: www.kristinbjorg.barnaland.is

ég sendi þér snöggvast tölvupóst með inngangsorðinu

Námsleyfi

2009-05-09T13:26:00.002Z

Ég er komin í semí námsleyfi. Skottan er fyrir sunnan í góðu yfirlæti og ég hér fyrir vestan að komast í gírinn fyrir ritgerðarsmíðina. Það er komið jafnvægi á söknuðinn og ég fékk í hendurnar í gær það sem ég þarf að lesa til að koma mér af stað í skriftir. Í morgun gerði ég svo stofuna mína að vinnuaðstöðu en ekki leti, leik og knús aðstöðu þannig að nú er ekkert því til fyrirstöðu að ég einbeiti mér að þessu verkefni... og þá fer ég að blogga hahaha ... og hefst þá lesurinn :)

Gleðilegt sumar

2009-04-23T11:40:00.003Z

Skráði mig í dag á sammala.is í tilefni sumarsins. Hef enn miklar efasemdir um hvernig ég eigi að verja atkvæði mínu á laugardaginn. Kannski að ég éti það bara. Varla það getur ekki farið verra með mig en stjórnarhættir undanfarinna áratuga.
Litla skott alltaf í stuði, valdi með mér fötin á sig í gær og leit út eins og illa skreytt jólatré. Hún var samt ekki sammála mér því hún tók út lúkkið og sagði svo brosandi; skemmtilegt :)
Hún er skemmtileg og klár.
Í dag ætlum við á sumargleði í snjónum þar sem sú stutta mun væntanlega standa á sviði í fyrsta sinn. Ég hlakka til.
Takk fyrir veturinn.

2. ára gull

2009-04-01T09:40:00.003Z

Litla gullið mitt er 2. ára í dag og í tilefni dagsins var hún sérlega árrisul. Hún var spennt að opna pakkann og lék sé um stund. Hún er samt ekki alveg að skilja af hverju hún er ekki lengur 1. árs og vill helst vera það áfram ef ég spyr. Hún var mjög hugsi yfir morgunmatinn, horfði til fjalla og sagði:
Ég ekki uppá fjall, bara Mosi uppá fjall. Ekki veit ég hvað hún átti nákvæmlega við en ekki verri pæling en hver önnur til að byrja þriðja árið á :)

vor í lofti

2009-03-23T20:29:00.002Z

Kús mamma mín kús og svo fæ ég svakalega innilegt knús :)

Lífið er dásamlegt, ég á svo yndislega stelpu sem vex og dafnar frá degi til dags, bæði andlega og líkamlega.

Ég held að það séu hressandi tímar framundan. Stelpan er fjörmikil og lyktin af vorinu kítlar okkur báðar.

uppvask

2009-03-02T22:06:00.002Z

Jæja, þá hef ég fyllt árin 36 og hef hafið ævintýri 37. aldurárs míns. Mér finnst alltaf skemmtilegra og skemmtilegra að lifa. Það er svo margt skemmtilegt sem mig langar að gera að það eru enganvegin nægilega margar klst. í deginum eða dagar í vikunni þannig að það sem mér finnst aðeins leiðinlegra situr á hakanum. Það er í raun fyrirtak nema að sumt af því leiðinlega þarf að gera á endanum. Núna t.d. bíður mín 2gja daga uppvask í vaskinum. Kristín sagði barnapíunni áðan að mamma sín þyrfti að vaska upp þannig að ég verð að gera ráð fyrir að nú sé komin tími til að setja á mig gúmmíhanska. Mig bráðvanta uppþvottavél, ef einhver á uppþvottavél á lausu vinsamlegast látið mig vita :) Ég var einu sinni harður andstæðingur uppþvottavéla, fannst þær bara fyrir hina lötu. Það var þegar ég var í skóla og borðaði sjaldan nokkuð sem þurfti meira en 1 pott til eða 1 símatal (svona rétt eftir mánaðarmót). Núna langar mig mikið í uppþvottavél og líka bæði ryksugu og skúringa róbot. Mér finnst að lífið geti bara orðið betra ef maður á þessi 3 tæki.
Æ núna ætla ég að vaska upp

Asasið

2009-01-28T23:13:00.002Z

Feisbúkk virðist vera að drepa bloggið mitt, þetta blogg. Það er alltaf eitthvað skemmtilegt að gerast en það ratar ekki hér inn.
Nýja árið leggst vel í mig þrátt fyrir allt og allt. Ég held að þetta ár verði alveg prýðilegt. Það er svo dásamlegt þegar daginn fer að lengja og sólin hækkar á lofti. Það flaug í huga mér í m0rgun hvað það væri í raun nauðsynlegt að vera búin að hýrast í þessa 2 mánuði í algjöru myrkri til að kunna fyllilega að meta þessa dásemdar birtu. Mér finnst hver dagur fallegri en sá fyrri og um leið og ég nýt andartaksins hlakka ég til næsta dags.
Það er heilsuátak í gangi hér og nágrannabyggðarlögunum. Ég tók þá ákvörðun að vinna það átak og held því til streitu þar til annað kemur í ljós :) Það er mér til happs að hér býr velviljuð kona sem hefur tekið mig í sína umsjá og finnst mjög gaman að sjá mig kveljast og gera mig að fífli í líkamsræktarsalnum. Ég er henni mjög þakklát fyrir stuðininginn og vona að það færi mig nær sigri. Reyndar ætla ég meira að hugsa um að gera þetta allt saman af skynsemi en ofurkappi, það er nú eða aldrei einhvernvegin að koma mér í form. Ég vil geta hlaupið á þau fjöll sem fyrir mér verða þegar mér dettur það til hugar.
Kristín er yndisleg sem áður. Það er farin að kjafta á henni hver tuska og hún er algjör páfagaukur. Það verður margt mjög fyndið úr hennar munni.
Allt út um allt - malt allt.
Pepsi - pepis.
Snjór- njós.
Afsakið - asasið

Nóg í bili.

Hátíð í bæ

2008-12-24T12:02:00.001Z

Gleðilega hátíð kæru vinir
þökkum allt

Kristín og Mosi

2008-11-08T13:12:00.002Z

Það hefur nú ekki enn komið til þess að ég fari tilneydd niður á bryggju að veiða mér í soðið. Ég keypti mér samt lyfrapylsu og er í þessum skrifuðu orðum að gera helling aðalbláberjasultu til að gera pláss í frystinum fyrir að föng.
Við höfum það annars svo ljómandi fínt hér fyrir vestan. Sá sem sagði að engar fréttir væru góðar fréttir hefði allt eins getað verið að tala um okkur hér. Vinnan er skemmtileg (báðar allt svo), Kristín alltaf jafn kát á leikskólanum og jú, við erum komnar með kisustrák á heimilið. Hann heitir Mosi og er hinn allra skemmtilegasti köttur. Hann er akkúrat eins og ég vil hafa ketti, blíður og góður en samt duglegur að leika sér bæði inni og við hina kettina. Hann er svakalega mikil félagsvera og á það til að hoppa uppí bíl á morgnanna á meðan ég festi Kristínu. Hann mjálmar svo alveg voðalega dramantískt þegar ég set hann inn og loka hurðinni.
Kristín er líka akkúrat eins og ég vil hafa litlar stelpur, með eindæmum uppátækjasöm og skemmtileg. Orðaforðinn eykst með hverjum deginum og þessa dagana er "má ég sjá" og "sjáðu mig" í uppáhaldi. Hún er mikil áhugamanneskja um knattspyrnu, og boltaíþróttir almennt, og þegar íþróttafréttirnar byrja og ég stend upp þá hleypur hún að sjónvarpinu og kallar "krakkar - má ég sjá".
Einn morguninn þegar við vorum nývaknaðar og ég hafði rétt kveikt ljósið tók Kristín um fótinn á sér, bar ilina uppað eyranu á sér og sagði -Halló! Ég hló eins og brjálæðingur og þá tók hún í hinn fótinn og bar ilina uppað eyranu og sagði aftur - Halló! síðan brosti hún sínu blíðasta og sagði - sími -gaman :)

Ég brýt odd af oflæti mínu

2008-10-08T14:59:00.003Z

Þetta lítur nú ekki vel út, þetta ástand. Ef að allt fer á versta veg ég þó veiðistöng og bý í nálægð við sjóinn. Svo er ég líka með bakgarð og er alveg tilbúin að bretta upp ermar og veigra mér ekki við að rækta vel í bakgarðinum mínum því það mun jú vera þjóðlegasti siður það að pota útsæðinu niður... Makkarónugrautur og lifrapylsa í kvöldmat. Í framhaldinu er bara að draga upp hugmyndir og uppskriftir af hollum ódýrum mat og brjóta odd af oflætinu, nema kannski endrum og eins.
Einhverjar hugmyndir?

Sóta

2008-09-15T19:32:00.002Z

Okkur hefur fjölgað aðeins, konunum í kotinu. Það hefur borið á því undanfarið að ung ferfætt kisukona hafi lagt leið sína hér inn, í það minnsta yljað sér í gluggaopinu. Á sunnudagsmorguninn kom hún inn mjálmandi og bar sig illa mjög. Ég sá aumur á henni og í stað þessa að reyna að sussumsveija hana út aftur, klappaði ég henni og talaði hlýlega til hennar. Hún tók kveðjunni aldeilis vel og sýndi ekki á sér nokkurt fararsnið. Ég gerðist þá gestrisin með eindæmum og bauð henni uppá gamlan hafragraut með seríós út á. Hún sýndi kurteisi og nartaði í kræsingarnar en stökk svo upp í gestarúm og lagði sig. Þar svaf hún meira og minna í allan gærdag og sefur þar enn að ég held. Ég og meintur eigandi kattarins áttum samtal í dag og stendur til að kisa litla flytjist við tækifæri suður með sjó til lögmæts eigenda. Þangað til verður hún að öllum líkindum gestkomandi á heimili okkar mæðgna.
Kisukonan heitir Sóta.

Kennslukonan ég

2008-09-09T19:31:00.003Z

Í dag gerðist ég kennslukona enn og aftur. Mér fannst það furðu gaman. Ég var eiginlega búin að telja mér í trú um að það væri barasta ekkert skemmtilegt. Ég hefði nú getað sagt mér það sjálf að það yrði voða gaman því að börn eru ekkert annað en snillingar. Núna hlakka ég til að vakna 3 morgna í viku til að kenna 1-4 bekk í 2 kennslustundir. Að öðru leiti held ég áfram að sinna hefðbundnu starfi mínu.
Kristín Björg er þó mesti snillingurinn. Hún er alltaf að finna uppá einhverju nýju og var voðalega glöð að komast heim í regluna og á leikskólann. Hún er voðalega mikið að æfa sig þessa dagana í að vera mjög mjög ákveðin. Áðan orgaði hún og orgaði af því að ég vildi ekki hjóla meira með hana. Hún gargaði svo lengi að hún var löngu búin að gleyma af hverju hún var að garga. Ég var svo undrandi lengi vel að ég gleymdi að reyna að dreifa huga hennar. Um leið og ég hætti að vera hissa hætti hún að orga.
Núna orgar hún af því að hún vill ekki fara að sofa og hendir snuddunni sinni fram á gólf svo að ég "verði" að rétta henni hana. Það eru aldeilis spennandi tímar framundan.

Komin heim

2008-09-08T21:10:00.002Z

Jæja, þá er sumrinu formlega lokið og haustverkin hafa tekið við af heimsóknum bæði til mín og frá mér.
Haustin hafa nær undantekninglaust markað nýtt uppaf hjá mér, nýtt nám, ný önn, nýtt heimili, jafnvel nýtt land. Þessu hefur alltaf fylgt spenna sem hefur gert haustin skemmtilegri fyrir vikið.
Í fyrsta sinn sem ég man eftir er ég að gera það sama að hausti og það sem af er árinu. Áður en ég kom heim aftur í gær hafði ég af því áhyggjur að mér ætti eftir að leiðast haustið, ekkert nýtt.
Í morgun gekk ég hinsvegar í vinnuna og þegar ég sá litskrúðug fjöllin sem eru að færast í haustskrúðan fann ég fyrir eftirvæntingu og ró. Haustið er yndislegt.

Aðalbláberjageðveiki

2008-08-24T22:17:00.004Z

Það er svo mikið af berjum hér um allar hlíðar að það er bara rugl.
Ég byrjaði að týna fyrir tæpum mánuði síðan og kom þá stolt heim í fyrsta sinn með tæpan lítra af blönduðum berjum (aðalbláber, bláber og krækiber) og fannst það æðislegt út á skyrið.
Sama kvöldið fór ég út og týndi kannski 2 lítra bara af aðalbláberjum og fannst ég hetja og bjó til 2 krukkur af sultu. Síðan hef ég getað leyft mér þau forréttindi að týna bara aðalbláber af því að mér finnst þau best.
Daginn eftir réði ég með mér 2 stelpur bæði til að leika við Kristínu og til að hjálpa mér að týna smá. Þá týndum við alveg helling, örugglega 5 litra og þá bjó ég til meiri sultu og frysti smá.
Svo fór ég nokkrum sinnum, náði að týna og bjóða í nokkrar berjaveislur fyrir sunnan og svo á leiðinni heim aftur týndi ég og bjó til sultur og frysti líka. Mér fannst ég hin mesta búkona.
Svo, og sko svo... var mér bent á það einn daginn að hægt væri að týna aðalbláberin með týnu og það sem meira er að mér var lánuð týna.
Í gær fór ég og týndi vaskafat af aðalbláberjum á rétt rúmum klukkutíma. Fór svo heim og bjó til 2,5 lítra af saft og niðursauð nokkrar krukkur og á svo fullt afgangs til að fryst. Í morgun bjó ég til aðalbláberjalummur og drakk aðalbláberjasaft.
Í dag fór ég aftur og týndi vaskafat af aðalbláberjum, og get ekkert gert við þau nema að frysta þar til ég hef nælt mér í krukkur og eitthvað til að búa mér í haginn.
Mér finnst ég búa við svo mikil forréttindi að ég er að springa.

Þannig fór um sjóferð þá

2008-07-03T23:32:00.003Z

Það er ennþá allt alveg frábært. Við skottumst hér í sælunni skotturnar, stundum skottast gestir með okkur, þá skottumst við inn og út fjörðinn jafnvel. Um síðustu helgi vorum við gestir. Kristín var fyrst ein gestur í 2 nætur og þá var ég líka gestur í mannlausu húsi. Síðan vorum við saman gestir í 2 nætur. Takk fyrir okkur ;)
Þó að það sé gaman að sitja heima og taka á móti gestum er líka gaman að bregða undir sig betri fætinum og skoða borgina. Ég kom ótrúlega miklu fyrir á 4 dögum. Sofa, borða, kaupa, tónleikar, bíó, borða og kaupa meira, með Kristínu í ljósmyndatöku, heimsóknir í Kef, jájá, alveg fullt og alveg ferlega fínt bara. Allar góðar ferðasögur innihalda smá hasar. Mín endar á hasar. Eftir alveg frábæra daga bæði í einveru og með frábæru fólki þá var komið að heimferð. Ég lagði tímanlega af stað úr borginni og var staðráðin í því að stoppa í 2 lágvöruverslunum á ferð minni vestur. Ég stoppa fyrst í Mósó og næli mér þar í eitthvað bráðnauðsynlegt og held síðan áfram ferð minni. Næsta ákvað ég að stoppa í Borgarnesi enda gat ég ekki betur séð en að ég hefði góðan tíma fyrir höndum.
Þegar ég er sest uppí bíl aftur átta ég mig á að ég hafði eitthvað misreiknað mig því nú var rétt rúm klst þar til báturinn átti að fara og rétt rúmir 100 km eftir. Ég velti því fyrir mér um stund að bruna bara af stað vestur akandi en rataði þá stuttu stund ekki akandi vestur. Mér gat ómögulega munað hvar væri beygt af þjóðveginum til að fara í Búðardal. Ég ákvað því að taka bara bátinn og láta happið ráða för.
Ég náði bátnum með því að bruna beint um borð og upphófst þá sú allra versta sjóferð sem ég hef upplifað. Skipið bæði valt og skall í öldunum þannig að það nötraði allt og skalf. Ég gat mig hvergi hrært og litla skott var ekki sátt við að fá ekki að hlaupa um. Reyndar var hún orðin kald sveitt og grunar mig að hún hafi verið að verða sjóveik. Eftir Flatey var miklu betra í sjóinn og við gátum spókað okkur um, Kristín eignaðist kunningja að vanda og við skemmtum okkur vel.
Þegar báturinn var að leggja að bryggju í Brjánslæk, gerði ég okkur klárar í bílnum og hlakkaði til að komast heim. Eftir nokkra stund áttaði ég mig á að ekki var allt með feldu og fékk þá að vita að landfestarnar hefðu slitnað þegar reynt var að binda og allir beðnir um að fara aftur niður og hafa það gott þar til annað yrði tilkynnt. Stuttu seinna var gerð önnur tilraun og slitnaði þá aftur. Við fengum þá tilkynningu um að veðurofsinn væri of mikill til að leggja að og að bíða yrði eftir að fjaraði, í það minnsta 2 klst. Þetta var súrsæt upplifun. Það skemmtilega við svona uppákomu er að allir fara að tala saman og það myndast alveg frábær samkennd í hópnum. Ég kynntist þarna m.a. ferðamönnum frá Litháen og horfði á teiknimynd með Reyni Pétri frá Sólheimum. Ég mundi einmitt eftir að hafa hitt hann á Selfossi þegar hann gekk hringinn. Sama dag sá ég mann með púðluhund og lamb í taumi, ég á af því mynd.
En þessi sjóferð tók enda eins og aðrar og 3.5 klst á eftir áætlun lagðist Baldur að bryggju í Brjánslæk en þá vildi ekki betur til en að það brotnuðu 2 rúður með tilheyrandi látum. við komum heim kl 11 um kvöldið eftir 11 tíma ferðalag og núna veit ég hvernig ég keyri heim til mín úr Reykjavík :)
Núna er þessi bloggfærsla orðin löng eins og ferðalagið, líklega hef ég hér sett met í bloggfærslulengd. Þá er ráð að standa upp og gera pláss fyrir alla þá góðu gesti sem koma á morgun.
Góðar stundir

Allt í sóma

2008-06-11T23:44:00.002Z

Það er ótrúlegt hvað það er auðvelt að gleyma sér og blogga ekki. Kannski er ég bara svona bloggari sem þarf að hafa allavega eitthvað eitt til að skrifa um eins og t.d. rýrnun, mér sýnist það svona. Hún rýrnuni gengur reyndar hægt. Ég bætti nú aðeins á mig á tímabili en er aftur komin á skrið og ég vona að ég komi rýrari undan sumri.
Við höfum það það bara svaka fínt mæðgurnar. Alltaf jafn kátar og glaðar. Kristín farin að labba og labba, ég farin að hjóla og hjóla. Er að bíða eftir barnastól á hjólið og hlakka ferlega til að fara með littla skott út að hjóla og sjá hvernig hún bregst við.
Ég sé fram á að vera að mestu bara hérna fyrir vestan í sumar. Við eigum von á töluvert af gestum og ég ætla að geyma mér flakka að mestu þar till seinna. Æ, við höfum það bara eitthvað svo ágætt.

jamm og já

2008-05-02T10:05:00.003Z

Það hefur nú margt gerst síðan síðast. Lífið alveg svoleiðis í góðri sveiflu. Sumarið minnir á mögulega komu sína endrum og eins og við erum kátar mægðurnar. Við höfum verið svoldið á ferðinni, erum heima eins og er en á suðurleið á sunnudag enn og aftur. KB á ekki eins auðvelt með svona flakk og myndi henta svona flökku móður en hún hlýtur að venjast því á endanum, hún er svo mikill snillingur.
Af rýrnunarmálum er það helst að frétta (fyrir áhugasama) að talan stóð í -11.7 á þriðjudaginn. Það gengur síður að rýrna þegar ég er mikið á flakki enda erfitt að vera með sérþarfir þegar manni er boðið í mat og margt sem glepur hugann þegar um meira er að velja en Hópið.

Á lífi

2008-04-24T21:38:00.002Z

Vil bara láta vita að ég er á lífi og vel það.
Meira við tækifæri

Hún

2008-03-27T08:46:00.002Z

Hún Kristín Björg er algjör snillingur. Það er svo mikið að gerast hjá henni núna að hver einasti dagur er fullur af ævintýrum sem aldrei fyrr. Hún er með eindæmum forvitini og nýjungagjörn og að fylgjast með henni er betra en nokkurt bíó. Um daginn tók hún t.d. upp á því að vilja bara borða skyrið sitt með tveimur skeiðum til skiptis, ömmur var venjuleg stálskeið hin var appelsínugul plastskeið. Við hverja skeið sem hún fékk smjattaði hún vel á matnum og sagði svo hátt ahhh þegar hún var búin að kyngja, eins og um hávísindalega könnun á gæðum skeiða væri að ræða. Hún Kristín er líka búin að fatta bækur og hefur mjög gaman af því að skoða þær. Í fyrradag fannst mér hún hafa verið of hljóð of lengi þar sem hún var að leika inní stofu. Ég fór og kíkti eftir henni og þá lá hún á gólfinu, hálf ofaná bók, og var að kyssa fólkið í bókinni og skælbrosti inná milli, alveg hreint í hamingju vímu. Haldiði að það séu ekki forréttindi að fá að búa með svona manneskju :)

-10kg

2008-03-25T13:02:00.001Z

Jibbíjei

Vor í lofti

2008-03-18T12:51:00.002Z

Í gærkvöldi fór ég á einleikinn Pabbann með og eftir Bjarna Hauk, alveg hrikalega fyndin sýning. Mér finnst hann gera foreldra hlutverkinu mjög skemmtileg skil og ekki síst alveg frábær ádeila á margt í samfélaginu. Það var gaman að komast loksins á leiksýningu, það var orðið allt of langt síðan síðast.
Kristín Björg heldur áfram að vera í banastuði í leikskólanum sínum. Hún er svo félagslynd og kát og finnst svo gaman að vera innan um fullt af fólki. Síðustu tvo sunnudaga hefur hún alveg verið að mygla á mér, á sunnudaginn fékk ég stelpu til að fara aðeins út að ganga með hana og til að leika aðeins við hana inni. Það var ekki nóg fyrir ungfrúnna og seinna um kvöldið komu gestir sem hún ætlaði bara ekki að sleppa út úr húsi nema að fá að fara með. Hún er algjört æði hún Kristín.
Rýrnuni var 300gr þessa vikuna, mikið vill meira eins og sagt er og í fyrsta skiptið finnst mér þetta bara alls ekki nóg :) núna telst mér til að 9.5kg séu farin og ég get ekki beðið eftir að ná 10 kg markinu.

-9,2 kg

2008-03-11T10:11:00.003Z

Þá eru svo lítið sem 9.2 kíló fokin og þá er Kristínar Bjargar markinu náð :)
Ég bindi góðar vonir við að ná 10kg markinu á næstu tveim vikum eða svo, þetta er ljómandi gaman allt saman.
Ég er farin að huga að því að hreyfa mig svoldið með bara, búin að fá pokahlíf fyrir göngupokann hennar Kristínar þannig að um leið og það fer aðeins að hægjast um í maga-óeirðunum þá get ég farið að þramma með hana hér um fjöll og fyrnindi. (eða bara um götur og göngustíga til að byrja með)

magakvalir

2008-03-10T09:20:00.002Z

Fyrsta helgin í sveitinni var ekki jafn ljúf og ég hafði gert mér vonir um. Á mig herjaða svaðaleg magakveisa með miklum verkjum sem náði hámarki í gærkvöldi, að ég vona að minnsta kosti. Ég náði þó að koma okkur aðeins betur fyrir á laugardaginn og þvo smá þvott. Í gær lagði ég svo land undir fót og fór yfir á Bíldudal. Þar áttum við yndislegan dag en minnstu munaði að ég næði ekki til baka vegna kveisunnar agalegu.
Núna er runninn nýr dagur, Kristín var glöð að komast í leikskólann og ég er kát í vinnunni og nú þarf ég að gera eitthvað skemmtilegt.
meira síðar

Á Tálknafirði er gott að vera snjósleðanum á, hei!

2008-03-07T10:51:00.002Z

Hér er alveg brjálaður vetur. Af og til gerir snælduvitlaust veður með blindhríð og dimmu en þess á milli skín sólin og þá lýsist fjörðurinn upp og það glampar í snjóinn í fjöllunum allt í kring. Mér hefur líka hvorutveggja við óveðrið og sólina, mér finnst þetta allt gaman, mest sólin samt eins og núna. Ég vona að hún verði með mér hérna allavega fram yfir hádegi þá ætla ég að reyna að taka mynd svo að ég geti sýnt hvað ég er að tala um :)
Kristín er hrókur alls fagnaðar á leikskólanum og skemmtir bæði sér og öðrum. Þær eru svolið hissa á hvað hún er sjálfstæð lítil kona... hún vill t.d. fá að borða brauðið sitt sjálf... enda ekki annað en sjálfsagt mál fyrst hún getur það.
Ég er búin að læra fullt nýtt í vinnunni sem er bara skemmtilegt, oft óþægilegt samt að þurfa að læra nákvæmlega allt en það gerir dagana meira spennandi.
Nú er að koma helgi og ég ætla að nýta hana í að reyna að gera enn fínna hjá mér svo að það sé nú ekki allt í drasli þegar fólkið kíkir inn um gluggana hjá mér, haha. Svo geri ég mér kannski líka ferð yfir fjallið og fer í heimsókn á Bíldudal, hver veit?

-200gr

2008-03-04T13:12:00.003Z

Mér til mikillar undrunar fóru 200 gr til viðbótar í síðustu viku. Ég er himinlifandi þar sem næringarleg óregla ríkti mestan hluta vikunnar. Núna er ég hinsvegar að taka stjórnina aftur og hlakka til frekari rýrnunar.
Kristín er á leikskólanm og stendur sig eins og hetja. Ég er í nýju vinnunni og stend mig líka eins og hetja, bíð nú eftir að læra meira.

Komnar

2008-03-03T13:31:00.001Z

Jæja, þá erum við komnar á Tálknafjörð eftir langt og tregablandið ferðalag. Þetta var sannarleg langferð þar sem margt var hugsað. Ferðalag fullt eftirvæntingar og saknaðar.
Meira síðar

pakk og bræðsla

2008-02-25T23:59:00.003Z

Ég er farin að halda að það vaxi dót inní skápunum hjá mér. Ég pakka og pakka en samt er alltaf eitthvað eftir í skápunum. Úffídídúff! Annars bara svoldið gaman að vera að flytja, er búin að festa kaup á nokkrum nýjum og notuðum hlutum í nýja húsið og get bara ekki beðið eftir að koma mér fyrir. Þetta er bara allt að skella á. Merkilegt hvað það er einhvernvegin meira að flytja svona þegar maður er komin með litla manneskju með sér á ferðalagið.

Annars gengur lífsstílsbreytingin alveg glymrandi vel. Í síðustu viku bræddi ég 3 og 6/10 þyngdar smjörs af mannafitu. Skelfilegt þegar þetta er sett svona upp en það fóru sem sé 1800 gr til viðbótar og það eru svo mikið sem 8kg í allt á 5 vikum. Þetta er með ólíkindum alveg hreint. Ég er vongóð um að þetta eigi eftir að ganga ljómandi áfram þótt að það verði spennandi verkefni að fá skemmtilegt og ferskt grænmeti fyrir vestan.

Núna þarf ég hinsvegar að koma mér í háttinn svo ég hafi orku til að klára að flokka, pakka og stafla á morgun.

smörstykki til viðbótar

2008-02-19T11:47:00.004Z

Mér finnst ógeðslega gaman þegar ég sé að einhver frá Japan eða Venesúela hafa skoðað þessa síðu. Vissuð þið það annars að Venesúela er síðast í stafrófröðinni af löndum latnesku Ameríku (og segið svo að það sé ekki lærdómsríkt að spila trivial).
Undanfarnir dagar og reyndar vikur hafa einkennst af pestum af allskonar tagi hér á þessu heimili. Litla krílið hefur mest fengið að finna fyrir því, ég hef sloppið furðu vel fram til þessa. Af þessum sökum tók ég dönsku vini mína ekki nægjanlega mikið til fyrirmyndar í síðustu viku þar sem ég bæti við mig mat til að geta búið til næga mjólk í lítinn maga sem þoldi illa annað en mömmumjólkina. Ég var alveg búin að sætta mig við að standa bara í stað í viktuninni í gær en viti menn enn fuku 500 gr, eitt smjör stykki þar :) þá eru rúm 6 kg farin. Ég held svei mér að ég geti verið búin að koma mér í pre-óléttu þyngd mína fyrir páska. Það væri nú algjör draumur, vúhú.
Baráttukveðjur til ykkar hinna ;)

og þau fjúka

2008-02-12T22:50:00.002Z

jú, hér gengur allt eins og það á að ganga.
Mér gengur misvel að tileinka mér nýju matarsiðina, er aðeins of kræf í að bítta og skipta út og inn því sem hentar mér en passa þó að ég sé að fá nokkurnvegin þá orku sem ég þarf í heildina, þ.e. hvorki of lítið né of mikið. Og viti menn, ég er búin að missa 800 gr til viðbótar sem gera 5.7kg í heildina og þar með er fyrsta markmiðinu náð, þ.e. 5kg og gott betur. Nú læt ég mér hlakka til að komast í -10kg.
Lítið annað að frétta, hef að mestu haldið mig heima við, Kristín er búin að vera meira og minna veik í 10 daga, allavega nóg til að ég hef ekki viljað vera á ferðinni með hana í þessum óveðrum.
Er hætt...

allt að gerast

2008-02-04T23:35:00.000Z

Og gleðilegt nýtt ár.... aldrei of seint fyrir góðar kveðjur.

Það sem af er þessu ári hefur verið með eindæmum viðburðaríkt og skemmtilegt.

Byrjaði árið á því að fara í 2 vikna fimmtugsafmæli til Kanarí með röskum hópi fólks. Ferðin var í alla staði hin besta og ég kom heim með töluverða sól í hjarta og hita í kroppnum.

Síðan er ég búin að ráða mig í vinnu vestur á Tálknafjörð þar sem ég ætla að vera alltmúlíg kona á hreppsskrifstofunni. Verkefnin þar hljóma mjög spennandi og ég hlakka til að bretta upp ermarnar og fara að vinna launað starf að nýju.

Jú, og svo hef ég hafið heilsuátak með miklum látum. Hef tekið upp nýja matarsiði með hjálp hinna dönsku ráðgjafa og það hefur verið voðalega auðvelt og 4.9 kíló fokin á 2 vikum.
Við erum allavega einar 4 úr Kanaríeyjaferðinni sem að höfum ákveðið að venda okkar kvæði í kross og mér reinknast til að fokin sé vel rúmlega ein Kristín Björg af óþarfa kílóum á 2 vikum hjá okkur. Mér finnst það nokkuð skemmtilegt. Ég er nú eiginlega búin að lofa að láta vita hvernig gegnur með nýju matarsiðina þannig að kannski verður þetta að æsi spennandi framahaldssögum um kílóin sem fjúka :)

þar til næst...

Gleðileg jól

2007-12-25T11:24:00.000Z

Í dansskóla

2007-11-18T15:09:00.000Z

Í haust byrjaði ég í konu salsa. Mér finnst það mjög gaman. Það var ekki fyrr en í 3ja tíma eða svo að ég fattaði að ég var í danskóla Heiðars Ástvaldssonar, alveg eins og þegar ég var krakki. Allt í einu fór -ein, tveir, þrír og krossa- að hljóma ansi kunnuglega. Svo gleymdi ég því í margar vikur að ég væri í danskóla Heiðars Ástvaldssonar þar til núna í síðasta tíma þá fengum við allar hláturskast. Þá leið mér aftur eins og ég væri 5 ára, alveg hreint ótrúlega gaman.
Ég vona bara að það verði framhaldsnámskeið eftir jól.

einmitt og akkúrat

2007-11-05T17:48:00.000Z

þá er ég formlega búin í sumarfríi enda ekki seinna vænnar þar sem jólin fara bara að nálgast þrátt fyrir að vorið sé svo til ný yfirstaðið
Jamm og já
fyrr en varir verður komið vor aftur

Í sumarfríi

2007-09-27T13:45:00.000Z

Þá er ég búin í fæðingarorlofi og ætli megi ekki segja að ég sé byrjuð í sumarfríi. Allavega verður það orlofsgreiðsla sem ég lifi af fram að áramótum.

Mér finnst það alveg hrópandi óréttlæti að hún Kristín mín hafi ekki sama rétt og flest önnur börn og hafa foreldri heima hjá sér til 9 mánaða aldurs. Það er alltaf verið að tala um rétt barna þetta og hitt en þegar kemur að einhverju eins og fæðingarorlofi þá er réttur barna ekki mikils metin. Ef pabbi hennar Kristínar væri dáinn þá fengi ég fæðingarorlof í 9 mánuði en af því að hann býr erlendis þá fæ ég bara 6 mánuði þrátt fyrir að hann eigi hvergi rétt. Mér finnst að ÖLL börn eigi að hafa sama rétt, ekki bara flest. Mér finnst alveg ömurlegt að þurfa að setja hana svona litla til dagmömmu, þrátt fyrir að vera svo heppin að hafa fengið dagmömmu hálfan daginn eins og ég kaus helst.
Núna er ég bara þakklát fyrir að hafa verið í fæðingarorlofi yfir sumartímann þannig að ég get verið heima hjá henni hálfan daginn eitthvað áfram.

Hún húsmóðirin ég

2007-09-23T21:06:00.000Z

Puttarnir á mér hafa verið að skrælna upp undanfarið. Þeir springa og verða sárir og stundum blæðir úr einstaka. Ég nefndi þetta við lækni fyrir nokkrum vikum og hann sagði mér bara að vera dugleg að bera handáburð. Ég hef verið mjög dugleg við að bera handáburð og samt eru puttarnir bara verri ef e-ð er. Ég ákað að flétta í hinni mætu bók Hverju svara læknirinn til að athuga hvað þar væri að finna um skorpna putta. Þar var lýsing sem átt vel við puttana mína og var sjúkdómsheitið -húsmæðra fingur-
Ef þetta er formleg víglsa í húsmæðrahlutverkið þá gef ég ekki mikið fyrir það

Draumurinn

2007-09-19T10:03:00.001Z

Í nótt dreymdi mig að ég væri í heimsókn hjá vinkonu minni. Hún hafði gefi Kristínu 2 alveg eins kjóla, annan of lítinn en hinn of stórann. Það var fleira fólk þarna í heimsókn. Þegar ég fór að gera mig klára fyrir heimferð spurði vinkonan mig önug hvort ég ætlaði ekki að þrífa gólfin áður en ég færi. Ég svaraði því til að ég væri nú búin að vaska upp og laga svoldið til en mér ditti ekki til hugar að fara að þrífa gólfin hjá henni þar sem ég nennti ekki einu sinni að þrífa gólfin heima hjá mér. Þá horfði hún á mig og sagði með mikilli fyrirlitningu; einmitt það!

morgun stund

2007-09-17T10:43:00.000Z

sjúkkit, ég var ekki vakin fyrr en klukkan hálf átta í morgun... ég verð að viðurkenna að ég var hálf sjokkeruð yfir þessu hálf sjö dæmi.
Hálf átta er fínt, ég samþykki það.

Ég er hætt að vera hissa

2007-09-16T21:28:00.000Z

Ég hef verið bæði undrandi og hissa á því hversu fáir virðast kíkja á þessa síðu mína en núna rétt áðan þegar ég skrollaði niður sá ég af hverju; innan við 10 færslur á síðustu 5 mánuðum. Ég yrði nú ekkert rík þótt mér yrði borgaður 500 kall fyrir hvert orð sem ég er búin að skrifa undanfarna mánuði.
Núna ætla ég í alvörunni að taka mig á. Þar sem ég er forfallinn fídbakk fíkill vil ég endilega biðja ykkur sem enn kíkjið hinga öðru hvoru að kommenta e-ð svo ég verði svaka dugleg. Jájá, þetta er bara svona, smá gulrót handa ösnunni.

Og já, ég plataði syfjuna pínu og er bara ekki enn farin að gera mig klára í háttinn, en núna ætla ég að skunda af stað.

að vilja eða ekki vilja!

2007-09-16T21:14:00.000Z

Þá hefur kvæði mínu verið vundið í kross (eða hvernig sem maður beygir þetta nú :) ) og ég hef verið gerð að A manneskju. Þetta ferli hefur tekið nokkra mánuði og í raun var komið aftan að mér með þetta allt saman og fótaferða tími hægt og bítandi verið að færast nær og nær nóttinni. Í morgun brá mér þó illilega í brún þegar ég vaknaði nokkuð hress kl. 6:30, já ég sagði 6:30. og var búin að fá mér morgunmat, fara í sturtu, gera okkur mæðgur klárar fyrir veisluferð, skrifa tölvupóst, koma þeirri litlu út í vagn, gera jóga og örugglega fullt annað fyrir kl 10 já, fyrir klukkan 10. Núna er klukkan 21:20 og líkaminn öskrar á hvíld en ég þrjóskast við af gömlum vana, sé ekkert vit í öðru en að vera komin uppí rúm fyrr en í fyrsta lagi uppúr miðnætti. En miðað við reynslu undanfarinna daga veit ég að ég læt undan á næstu 10-15 mín og verð skriðin uppí rúm fyrir kl 10 enda ekki vit í öðru þegar ég er orðin bullandi A manneskja í morgunsárið.

Heyrðu þá er hún komin, syfjan og ég ætla að hlýða henni,
góða nótt

Af hverju?

2007-09-11T18:55:00.000Z

Af hverju enda allar Ikea ferðir á pulsu, gosi og jafnvel ís?
Af hverju?

Rörið sem sprakk

2007-08-29T11:31:00.000Z

Einn sólríkan dag fyrir skemmstu sprakk vatnslögn í götunni minni. Það dregur sjaldan til tíðinda í götunni minni og fáir sjást hér fótgangandi nema ég og hin konan sem er með ungabarn. Við brosum gjarnan til hvor annarar og uppá síðkastið erum við farnar að kasta kveðjum á milli og jafnvel spyrja til veðurs ef við erum ekki komnar nema hálfa leið út úr húsi.
Þennan sólríka dag dróg hinsvegar til tíðinda, það sprakk ekki einungis vatnslögn þannig að malbikið lyftist frá jörðu og vatnið rann í stríðum straumum eftir götunni heldur fylltist gatan líka af fólki. Fyrst voru það bara ég og maðurinn við hliðiná, svo kom löggan og svo hver nágranninn á eftir öðrum. Gatan hreinlega iðaði af lífi, allir voru spenntir og ærslagangurinn mikill yfir sprungnu vatnslögninni. Ég lærði nokkuð í óspurðum fréttum um hagi nágranna minna og fannst ég nokkuð heppin með að búa í svona mannmiklu hverfi.
Sama kvöld kom grafa og krafsaði eitthvað í holu og síðan hefur rörið sjálfsagt verið lagað, holan jöfnuð og í gær var klárað að malbika yfir allt saman aftur.
Ekkert hef ég þó séð af nágrönnum mínum frá því sólríka daginn sem rörið sprakk.

Þoka

2007-08-28T11:08:00.000Z

Það er frekar fyndið að lifa lífi þar sem dagurinn snýst um bleyjur og falleg bros. Það gerist alveg hellingur af skemmtilegu öðru en það virðist gleymast jafn óðum þegar kúkasprengjum er varpað yfir rúmið mitt árla morguns eða þegar ný tannsla lítur dagsins ljós.
Einhvern daginn léttir þokunni og ég fer að muna.

jú jú

2007-07-27T15:33:00.000Z

Ég hef ekki gefið upp alla von
Ég þakka þeim sem lesa
Þetta er líklega spurning um þolimæði og þautseigju
Ég á sitt lítið af hvoru

Á ég?

2007-07-17T11:56:00.000Z

Ég er mikið búin að velta fyrir mér hvort ég eigi að halda þessu bloggi áfram og þá fyrir hvern. Heimsókir hingar eru afar fáar og ég verð að viðurkenna það að fítbakk fíkill sem í mér býr nennir ekki að vera að halda opna dagbók ef enginn les og kommentar.
Ég ætla að prófa hvort ég næ að henda mér í gang, en það lofar ekki góðu því í augnablikinu man ég ekki eftir neinu sem mig langar að færa ykkur fréttir af nema uppátæki Kristínar Bjargar og hún á síðu fyrir það sjálf.
sjáum hvað setur

Ofurhetja

2007-06-09T17:23:00.001Z

Um daginn átti ég við ofurhetjur í daumi mínum. Batman stóð uppá Aðalstöðinni sem var jafn stór og mér fannst hún vera þegar ég var 5 ára og lagði skaut hann línu eins og Spiderman alla leið upp að kaupfélaginu í stóru blokkinni. Þar var einhver önnur ofurhetja sem ég man ekki hver var. Ég stóð akkúrat þannig að ég sá vel til beggja aðila og það hefur örugglega verið mín ofuhetjutendens í þessum daumi. Að öðru leiti man ég ekki um hvað draumurinn snérist en mér fannst gaman að leika með öðrum ofurhetjum um stund.

Síðu Kristínar Bjargar er líka hægt að nálgast á:
http://www.kristinbjorg.barnaland.is/

Pussy cat

2007-05-01T00:18:00.000Z

Stórfrétt dagsins er að ég held að fundið sé snuð sem prinsessan í ríki mínu kann að meta. Ég held að dagurinn í dag marki tímamót og sé upphafið að löngum og færsælum vinskap milli Kristínar Bjargar og Pussy cat.
Af mér er annars lítið að frétta

Meiri fréttir af Krisínu og fullt af nýjum myndum á:

http://www.barnaland.is/barn/58713/

Vefbækur

2007-04-20T10:28:00.000Z

Mér finnst það nú hálf fyndið að ég hafi gert mér vonir um að ég gæti haldið úti vefbókum bæði fyrir mig og Kristínu. Það sem hefur hinsvegar gerst er að ég skrifa bara hreint ekki neitt á hvorugum staðnum. Reyndar finnst mér oftast fremur tíðindalaust, lítið um að fínar kelllur eða skrýtnir kallar hafi orðið á vegi mínum og fjöldi brjóstagjafa og kúkableyja finnst mér þunnar fréttir utan veggja heimilisins. Þetta er þrátt fyrir það afar spennandi allt saman og hver dagur þrunginn dramatískum plottum og uppákomum.

Ég er búin að setja inn nýjar myndir:

http://www.barnaland.is/barn/58713/

fín frú

2007-04-12T23:12:00.000Z

Í gær brugðum við mæðgurnar okkur bæjarleið með Irmu og Þorgeiri sem er í raun ekki í frásögufærandi nema hvað fín frú varð á vegi mínu. Ég lagði þann ósóma fyrir mig að stoppa á börgerkíng til að fá mér feita ameríska hraðmáltíð og fyrir aftan mig í röðinni var frú í fínni kanntinum sem var með fjölskylduna í beinni í símanum að lesa matseðilinn og taka niður pantanir. Frúin góða ætlaði nú mest að fá salöt og baguette borgara. Afgreiðslustelpan sagði henni þá að því miður væri væri baguette brauðið búið hjá þeim. Fína frúin varð þá æfa reið og sagðist hafa borðað á börgerkíng um víða veröld og aldrei lent í öðru eins. Hún bað því næst að fá að tala við yfirmanninn á vakt sem vildi svo illa til að var eldri maður af erlendum uppruna sem var ekki nógu góður í íslensku til að svara svívirðingum þessara veraldarvönu fínu frú.
Það sem ég skil ekki er hvað í ósköpunum fólk er að gera á börgerking ef það vill salöt og samlokur úr baguette brauði.

Munur að hafa allt í plús

2007-04-06T21:31:00.000Z

Eitt af því sem hefur komið mér á óvart við að verða mamma er að ég er ekki eins mikill sjónvarpssjúklingur og ég hélt ég væri. Fyrir utan það að ég varla horft á sjónvarp síðan Kristín Björg fæddist þá steingleymdi ég að pæla í því að survivor væri í sjónvarpinu í kvöld, og þá er nú fokið í flest skjól. Ég ætla nú samt ekki að gefa sjónvarp alveg uppá bátin og ef hún heldur áfram að sofa svona vært þá næ ég að horfa á survævorinn á plúsinum eftir 25 mín.

Kristín Björg: http://www.barnaland.is/barn/58713

barnaland að komast í gang

2007-04-05T22:06:00.000Z

Ég er búin að setja nokkrar myndir inn
http://www.barnaland.is/barn/58713/
lykilorðið er þorpið þar sem hann pabbi minn á heima.

Annars bara allt gott að frétta. Kristín Björg er algjört ljós og allra manna hugljúfi. Ég fór aðeins með hana út í vagn áðan í kvöldmat til Stínu ömmu og hún kippti sér ekkert upp við það.
Ég ætla að reyna að vera dugleg að bæta inn myndum og dóti á síðuna hennar á morgun og næstu daga, hér ætla ég svo að reyna að halda áfram að flytja fréttir af mömmuleiknum.

Það hafðist

2007-04-05T08:14:00.000Z

Ég náði nú ekki alveg að eignast barn þarna á laugardeginum en á sunnudaginn komi í heimin þessi líka yndislega stelpa sem hefur fengið nafnið Kristín Björg. Hún var 16 merkur og 52 sm og bara mjög vel gerð á allan hátt. Við komum heim í gær og ég veit eiginlega ekki hvorri okkar finnst það betra. Kristín Björg sefur og drekkur eins og herforingi og er algjör engill. Svo að hún sé nú kona með konum þá er ég að vinna í að gera handa henni síðu sem kemst vonandi í gagnið seinna í dag eða á morgun. Ég hendi slóðinni hér inn.

Í dag

2007-03-30T19:44:00.000Z

Í dag var ég bara með eitt á planinu; að eignast barn.
Ég sé ekki fram á að ná því fyrir miðnætti.
Æ, ég fresta því bara til morguns!

bumban

2007-03-30T00:01:00.000Z

Í kvöld prófaði ég að láta kókópuffsskál sitja á bumbunni. Hún small eins og flís í rass.
Mér fannst það gaman

langar

2007-03-29T10:54:00.000Z

Mig hefur langað í brauð með hnetusmjöri og sultu í marga marga daga en man aldrei eftir því að eignast hnetusmjör. Í morgun vaknaði ég með þá skýru hugsun að nú ætti ég hnetusmjör, ég sá það meira að segja fyrir mér í ískápnum og það eina sem fékk mig framúr var tilhugsunin um að fá loksins loksins brauð með hnetusmjöri og sultu. Hvílík vonbrigði þegar ég var búin að leita af mér allan grun og fékk bara brauð með osti og gúrku.
Í dag ætla ég að eignast hnetusmjör.

Vorið er komið, eða var það lóan, æ...

2007-03-28T11:52:00.000Z

Fréttin sem tröllreið þjóðinni í gær var að lóan væri komin. Héldu fjölmiðlamenn upp til fóta ekki vatni fyrir þessum miklu fréttum og kepptust fréttastofurnar sem mest þær máttu við að sannfæra landsmenn að þar með væri vorið komið, ekki lýgur lóan!!!
Við erum svo fyndin og forpúkuð oft, við íslendingar. Sama dag og við vöknum upp við alhvíta jörð og skíðasvæði reykvíkinga eru opnuð eftir hlé, þá er hafin áróðursbarátta við að sannfæra þjóðina um að "vorið sé víst komið", vegna þess að nokkrir litlir fuglar mæta á svæðið og spáð er 2 stiga hita daginn eftir.
Ég er ekki sannfærð en mér finnst þetta skemmtilegt.

Það var stutt bil !!! Enn ólétt

2007-03-27T21:37:00.000Z

Heilbrigðisstofnun Suðurnesja gerir greinilega kraftaverk. Eftir 6 tíma legur voru 2 af 3 einkennum eitrunar horfin og ég útskrifuð eins og nýsleginn túskyldingur.
Þá er ég bara komin heim aftur og vanda mig sem aldrei fyrr að slappa af og passa þrýstinginn.

Enn ólétt

2007-03-27T14:19:00.000Z

Þá er tjelling bara komin með fyrsta stig meðgöngueitrunar.
Er að pakka niðrí tösku og á leið á sjúkrahúsið.
Þau vilja endilega hafa mig þar í bili.
Kannski að ég komi næst heim með barn, hver veit.
Spennan er gríðarleg.

Enn ólétt

2007-03-25T15:15:00.000Z

Ég er að hugsa um að hafa þetta sem titil á öllum mínum færslum þar til hann hættir að vera sannur. Ég er reyndar ósköp lítið óþolimóð ennþá. Síðasta vika hefur farið í að vera með flensu og mest öll orka mín í það að ná andanum á milli hóstakasta og snítinga. Það er lán í óláni við a.m.k 8 daga flensu á 39. viku meðgöngu að mig langar óskaplega lítið að eignast barn á milli hóstakasta.
Í gær fór ég á Selfoss að kveðja góða konu. Þórunn systir hans Heiðars fósturpabba dó úr krabbameini fyrir rúmri viku og hafa nú báðir feður mínir misst systir úr þessum hörmulega sjúkdóm á innan við 2. mánuðum.

Ég verð alveg matvana þegar ég reyni að skilja hversvegna það hefur ekki fundist lækning við svo mörgu og af hverju meiri tíma og fé er ekki varið í rannsóknir og þróanir á lyfjum á sama tíma og óhemju fé er enn varið t.d. í hergagnaframleiðslu og í betri geimför.
En það er náttúrulega svo margt sem við vitum ekki né skiljum. Ég meina það er ekki einu sinni vitað fyrir víst hvað það er sem kemur fæðingu af stað, merkilegt nokk. Það er allavega á hreinu að við komum í þennan heim og kveðjum hann á einn veg eða annan og hver við erum og það sem við gerum þess á milli er það sem okkar er minnst fyrir.

Nú ætla ég að fara að reyna að kaupa það sem mig vantar í Sushi til að seðja ósegjanlegri þörf og fara svo í slökun í von um að barnið líti á það sem boðskort út í hinn ytri heim.

merki

2007-03-19T20:59:00.000Z

Ég er aðeins farin að fara úr hárum eftir 8 mánaða hlé.
Er það ekki klárlega merki um að fæðing sé rétt handan við hornið?

Hungur

2007-03-18T23:02:00.000Z

Ég hef ekki hugmyndaflug lengur í þetta endalausa hungur sem herjar á mig.
Ég hlakka ekki lengur bara til að eignast barn heldur hlakka ég til að hætta að vera ólétt, mér finnst það ekki lengur gaman. Náttúran sér alveg um að konan sé tilbúin að annast barnið með því að gera meðgönguna of langa. Barnið var tæknilega séð tilbúið að fæðast í heiminn fyrir viku síðan samt sem áður er líklegast að það láti ekki sjá sig fyrr en eftir rúmar 2 vikur og svo verður það sótt ef það verður ekki komið eftir 3.
Annars get ég ekki kvartað mikið, ég er hress og hraust og get ennþá gripið um tærnar á mér en ég hlakka mikið mikið til að sofa á bakinu og maganum og hlaupa um og hoppa og skoppa.
Það er svo margt sem mig hungrar í.

Prumpulykt

2007-03-12T20:14:00.000Z

Það hefur aldrei vafist fyrir mér að prumpa, það er nokkuð sem hefur reynst mér mjög auðvelt. Hingað til hef ég getað losað mig við loftið á nokkuð hljóðan og lyktarlausan hátt. Undanfarið hefur loftlosun mín færst óþarflega mikið aukana og bæði hljóð og lykt einnig aukist jafnt og þétt. Nú er svo komið að ég er ekki í húsum hæf. Ég veigra mér næstum við að fara út í búð og þegar verst lætur er lyktin svo slæm að ég er orðin dónaleg gagnvart sjálfri mér. Ef ég á bágt með að vera í minni eigin prumpulykt hvernig get ég þá boðið öðru fólki upp á hana?
Ég vona að þetta sé tímabundið en ekki viðvarandi ástand því annars verð ég bara ein það sem eftir er með rassinn út um gluggann.

35 ára

2007-03-03T12:07:00.000Z

Þá er ég barasta orðin 35 ára. Mér finnst það gaman. Var að fatta að það er eiginlega stórafmæli, svo á ég aftur stórafmæli á næsta ári, það verður líka gaman.
Í gær varð ég í fyrsta skiptið vör við lækkun matvælaverðs, ég ákvað að líta á það sem afmælisgjöf. Á næsta stórafmæli langar mig í alvöru jafnaðarmannaflokk að gjöf. Flokk sem þorir raunverulega að stíga skref til að jafna kjör almennings. Ég ætla að bíða og vona.

Að öðru

2007-03-01T12:24:00.000Z

Hversu mikill fáviti þarf maður að vera til að gefa fátæku fólki útrunnin mat?
Er hægt að leggjast mikið lægra í lágkúr, vesæld og nísku?

Að nenna II

2007-02-28T18:53:00.000Z

Núna nenni ég sko öllu. Þyrfti aðeins lengri dag, fleiri þvottavélar, 8 arma og fleirri matartíma.
Ég er loksins komin í stuð til að elda góðan mat. Bjó mér til Sushi í gær sem ég var búin að bíða mjöööög lengi eftir, núna er ég að baka köku, jájá.
Nú er það spurning um að nenna eða nenna. Eina sem mig vantar er pínu nenna til að fara í sund og út að labba. Rétt á eftir ætla ég samt í jóga, svona þegar ég er búin að kippa kökunni úr ofninum.

Að nenna

2007-02-22T22:09:00.000Z

Þessi dekurrófufærsla er búin að vera efst á blaði of lengi. Ég hef bara einhvern vegin ekki fundið tilefni til að skrifa undanfarið. Um leið og ég er sífellt meira fyrir blessuðu barninu sem er farið að finnast þröngt um sig þá fyllir það hug minni meir og meir í réttu hlutfalli við plássleysið í kviðnum.
Annars er ég enn í banastuði, er búin að minnka töluvert við mig vinnuna og bíð eftir að hreiðurgerðarstigið komi yfir mig. Ég hlakka voðalega til að nenna að laga til og breyta og bæta en ástandið er þannig að ég nenni með naumindum að vaska upp og þvo af mér þvott. Eitt er það hinsvegar sem ég nenni alveg og það er að liggja í baði. Núna er komið að þeirri stund dagsins.

Að yngja upp

2007-02-12T22:41:00.000Z

Í gær var mér (okkur barninu) færð gjöf - nýr bíll!!!
Hann er náttúrulega ekki glænýr en hann er nýji bíllinn minn og töluvert yngir en gamli bíllinn. Ég er eiginlega enn orðlaus og um leið og ég er ótrúlega hrærð og full þakklætis finnst mér ég hljóma eins og dekurdúkka að segja frá því að pabbi minn og frú hafi gefið mér bíl.
En ég er ekki dekruð, í alvöru.

Móðusýkin

2007-02-06T23:43:00.000Z

Ljósan sannfærði mig um það í mæðraskoðun í dag að ég er ekki móðursjúk þannig að ég er þá bara móðusjúk og við henni er bara ein lækning.

Það styttist og styttist

2007-02-04T23:17:00.000Z

Þá eru bara 5-9 vikur eftir miðað við það sem eðlilegt telst. Ég ætla að reikna frekar með nær 9.
Undanfarið hefður bæði móðursýku og móðusýki verið partur af lífi mínu.

Móðursýkin felur m.a. í sér áhyggjur af hreyfingum barnsins eða réttarasagt hreyfingarleysi barnsins sem hefur valdi mikill neyslu af grænum frostpinnum undanfarið (og barnið löngu orðið ónæmt fyrir kuldanum sem þeir valda)

Móðusýkin er viðvarandi og síversnandi ástand sem orsakar hæga hugsun og minnisleysi á öllum sviðum sem ekki snerta ástand mitt. Kosturinn við þetta hugarástand er að ég upplifi það í sífellu að þegar ég er að reyna að muna eitthvað hverfur öll hugsun, ÖLL hugsun. Þetta er nokkuð sem ég hef aldrei upplifað áður og er ágætis tilbreyting frá því að vera með stanslausar flóknar hugsanir í gangi.

Þetta er fyndið og skemmtilegt ástand

Maís

2007-01-27T14:20:00.000Z

Hrykalega er maís góður matur. Ég er ekki hissa á að beljurnar í USA séu svona feitar. Ætli þær fái líka smjör og salt með sínum maís?

Draumur í dós

2007-01-25T20:53:00.000Z

Mig langar að leggja allan heiminn að fótum mér.
Ég var að bóka fyrir mig og krílið með í ferð til Ítalíu í júní í góðri trú um að örlagadísirnar verði mér hliðhollar.

Kellingabækur

2007-01-24T16:22:00.000Z

Nei, þær ljúga sko ekki kerlingabækurnar sem ráðleggja að fólk fari ekki svangt út í búð að versla í matinn.
Nú á ég troðfullt eldhús af hollum og góðum mat og sé ekki fram á að hafa tíma í annað en að elda og borða næstu daga.

Að stækka

2007-01-22T20:55:00.000Z

Ég vissi að ég myndi vaxa um kviðinn
ég vissi að brjóstin myndu stækka
ég vissi meira að segja að fæturnir myndu mögulega stækka
ég vissi hinsvegar ekki að höfuðið á mér myndi stækka!!!

þannig er það

2007-01-09T22:21:00.000Z

Stundum þegar ég er að skoða bloggsíður fólks sem ég þekki fatta ég þegar ég er byrjuð að lesa að ég er ekki með á hreinu hver á síðuna. Stundum uppgötva ég það þegar mér finnst skrýtið að fólk sem ég tel barnlaust er farið að tala um uppeldi barna sinni eða strákar að tala um fyrirtíðarspennu. Þá finnst mér skemmtilegt að lesa áfram og reyna að giska á hver á síðuna án þess að kíkja á slóðina. Stundum tekst það og stundum ekki.

menningarmunur?

2007-01-07T11:46:00.000Z

viðskiptavinur: Góðan dag
afgreiðslustelpa: Góðan dag
viðskiptavinur: hvernig langlokur áttu?
afgreiðslustelpa: æ, ðúvist, bara svona allskonar
viðskiptavinur: með hverju eru þær?
afgreiðslustelpa: sko, bara ðuvist, svona skinku og beikoni og svona ðuvist.
viðskiptavinur: geturðu sagt mér hvað er á langlokunum svo ég geti ákveðið hvernig ég ætla að kaupa.
afgreiðslustelpa: sko, ðúvist, þú getr sko alveg bara valið sjálf ðuvist, við búmðær til hér og eigum allskonar til að setja áðær.
viðskiptavinur: frábært ég ætla að fá eina með...

Skrímsli

2007-01-05T23:13:00.000Z

Þá er ég búin að taka skrautið af tréinu góða og eftir stendur minningin um fallegasta jólatré í heimi. Nú veit ég bara ekki hvernig ég á að koma ferlíkinu út úr húsi.
Getur einhver komið í heimsókn og hjálpað mér að losa mig við skrímslið?

Súpan

2007-01-02T21:23:00.000Z

Ég geri gjarnan grænmetissúpu sem er hið mesta lostæti. Þrátt fyrir að súpan sé alltaf sérlega góð geri ég undantekningarlaust alltof alltof mikið af henni og enda yfirleitt á því að bjóða fólki í mat og henda restinni.
Í dag þegar ég var að búa til súpuna datt mér þjóðráð í hug: að nota minni pott.

Tímamót?

2006-12-31T15:29:00.000Z

Þá er síðasti dagur ársins runninn upp og hann er alveg hreint ágætur eins og megnið af því ári sem er að líða.

Ég óska ykkur gæfu og hamingju á komandi árum og þakka liðnu árin

2006-12-25T11:34:00.000Z

Gleðileg jól kæru vinir

Jólafríið

2006-12-22T01:20:00.000Z

Þá er ég loksins loksins komin í jólafrí.
Það er alveg dásamleg tilfinning.

Jólatréið

2006-12-17T21:48:00.000Z

Ég hef eignast mitt fyrsta jólatré og er algjörlega hugfangin. Ég er sannfærð um að þetta er fallegasta jólatré í heimi. Já, ég varð svo uppmeð mér á meðan ég var að skrifa þetta að ég ákvað að smella barasta af því mynd:

Annars er þetta jólatré í stærra lagi, bæði er það mjög mikið um sig (eins og eigandinn) þannig að það tekur stóran hluta stofunnar og eins er það einnig mjög lágreist (eitthvað annað en eigandinn) þannig að það komast ekki margir pakkar beinlínis undir það. En fullkomið er það og mér finnst ég ógurlega fullorðin eftir að hafa fært jólin svona í hús. Um daginn bakaði ég líka, og á föstudaginn eignaðist ég fyrsta jóladiskinn minn, já og um daginn bjó ég til minn fyrsta aðventukrans (hann sést líka á myndinni) ég hef bara aldrei verið svona jólaleg, ha.

Ég er jólastelpan í ár, það er ekki spurning.

Draumar

2006-12-05T23:02:00.000Z

Draumfarir mínar hafa verið með eindæmum fullar af ævintýrum og undarlegum aðstæðum upp á síðkastið. Ég hef verið föst í sjávarborg, verið hundelt klæpakvendi og í nótt var í nauðug innleidd í glæpagengi undir stjórn Al Pacino´s.
Ég þarf svo sannarlega ekki að horfa á sjónvarp þessa dagana.

1. des

2006-12-01T23:42:00.000Z

Ég er eins og nýjsleginn túskyldingur eftir að hafa farið í hárgreiðslustofuheimsókn í dag. Mér líður fullkomlega í takt við vaxandi jólabrjálæði sem er að ná yfirhöndinni hér í bæ. Það er mjög hughreystandi að sjá gamalkunnar skreytingar skjóta upp kollinum útum allan bæ og spennandi að fylgjast með þeim nýju.

...

2006-11-29T22:31:00.000Z

Lífið er alveg hreint ljómandi fínt þrátt fyrir að ég virðist hafa glatað hæfileikanum til að vaska upp og almennt að taka til í kringum mig.

sjitt

2006-11-23T21:47:00.000Z

Úff hvað ég vildi að það væri heimsending á kókópuffsi

Í fyrramálið

2006-11-21T23:51:00.000Z

Í fyrramálið get ég sofið 20 mínútum lengur en venjulega á virkum dögum.
Mér líður eins og ég hafi unnið í happadrætti.

nokkrar sortir

2006-11-20T22:03:00.000Z

Fyrir nokkrum árum ákvað ég að baka smákökur fyrir jólin, henda í eina sort eða svo. Ég stóð við það með því að kaupa tilbúið amerískt deig sem ég skar niður í skífur.
Undanfarið hef ég fundið jóla andann hellast yfir mig. Ég er enn að berjast við að hleypa honum að af fullum kraftir enda vil ég alls ekki vera komin með leið á jólunum löngu áður en þau skella á. Í staðin ákvað ég að baka nokkrar sortir og skreyta kannski í byrjun desember. Mér fannst þetta mjög fullorðinsleg ákvörðun. Núna hefur bakaraofninn hinsvegar sagt upp störfum og ekki von á nýjum alveg í bráð. Ég hugsa að ég fullorðnist ekki svo mikið fyrir þessi jól.

englasnjór

2006-11-19T22:07:00.000Z

Slenið hefur algjörlega heltekið mig undarnfarna 2 mánuði. Ég hélt að það væri bara endalaus flensa en svo minntist ljósan á járn skort við mig á þriðjudaginn og ég fór strax og undir eins og fjárfesti í slíku. Viti menn, ég reis á þriðja degi aftur upp frá máttleysi og þreytu. Krafturinn var ótrúlegur á fyrstu 2 orkudögunum mínum, hef verið aðeins latari síðan sökum kulda.
Í dag fylltist ég svo þakklæti fyrir allan kuldann undanfarið því ég varð ekki vitundarögn pirruð yfri snjónum. Mér finnst snjórinn fallegur og saklaus. Ég dreif mig út í göngutúr.

Ég er með

2006-11-01T22:36:00.000Z

Ég er með frunsu og hor í nefinu
Ég er með astma og slím í lungunum
Ég er með hamborgara, hnetur og súkkulaði í maganum
Ég er með sól í hjartanu

Ég skrapp aðeins til útlanda um helgina, var veik helmingin af tímanum og minna veik og himinlifandi hinn helminginn. Ég elska að ganga um götur borgar sem iðar af lífi og fjölbreytileika. Ég er sannfærðari um það nú en nokkru sinni að það hentar mér illa að búa og starfa í Keflavík city. Ég stend samt sátt við þá ákvörðun mína að vera hér fram eftir næsta ári... sannfærð um að einhver stórborgin bíði mín áður en langt um líður.

Kartöflumús

2006-10-13T07:41:00.000Z

Kartöflumús með lambakjöti
Kartöflumús með ítölskum spagettíbollum
Kartöflumús með ristuðubrauði með linsoðnu eggi og spægipylsu
Kartöflumús með kartöflumús

Fékk ábendingu um kartöflur með rifsberjasultu og tómatsósu. Ég er ekki alveg viss með tómatsósuna en kartöflumús með rifsberjasultu hljómar vel.

Órar um fæðutegundir

2006-10-11T07:41:00.001Z

Nú er ég komin niðrí hámark 1 skál af kókópuffsi á dag. Hinsvegar er erfitt að komast í gegnum daginn án spægipylsu og appelsínu. Merkilegur fjandi.

Þar sem ég held að ég verji hverjum einasta dropa af hugmyndaflugi í vinnunni þykir mér líkilegt að ég breyti þessari síðu tímabundið í "óra um fæðutegundir", það virðist vera eina sviðið sem mig skortir ekki hugmyndaflug.

kókópuffs

2006-09-26T21:57:00.000Z

Það besta sem ég veit í dag er kókópuffs. Ég er búin að borða 3 skálar og mig langar í meira. Ég held að ég láti það ekki eftir mér að borða eina skál enn.

Og þó!

strákurinn í ísbúðinni

2006-09-15T22:50:00.000Z

Í dag fór ég í bestu ísbúð í heimi. Á undan mér í röðinni var uþb 12 ára strákur. Hann keypti sér ís fyrir 470 krónur og setti 30kr afgang sinn í bauk fyrir barnaspítala hringsins. Það fyrsta sem ég hugsaði var hvað þetta væri góður strákur og hrósaði honum fyrir framtakið, hann sagði ekkert. Síðan datt mér í hug hvort hann hefði ekki nennt að vera með klink í vasanum og sú tilhugsun skelfdi mig.
Niðurstaðan er sú að það er ekki hægt að lesið eingöngu úr hegðun fólks.

Allt að gerast, lítið að frétta

2006-09-13T19:17:00.000Z

Mig langaði til að vera með glæsilega innkomu inn aftur eftir sumarfrí en er að átta mig á að ég er ekkert miklu frjóari nú en síðast.
Mér líður eins og ég hafi tapað sköpunargáfunni og ég finn hana ekki aftur. Mig langar samt til að venja komur mínar hingað á ný. Sjáum hvað setur.

Fordómar

2006-07-23T22:58:00.000Z

Mér finnst alveg ferlega ómerkilegt að Big heiti John eftir allt saman. Hann verður eitthvað svo óspennandi fyrir vikið. Ætli sé hægt að vera með nafnafordóma?

Gleðileg leiðindi

2006-07-20T22:56:00.000Z

Þá er mér loksins farið að leiðast smá í Keflavík. Ég var með sanni farin að hafa áhyggjur af því hversu róleg ég hef verið undanfarnar 2 vikur. Núna langar mig að baða mig í höfuðborginni og skoða náttúru landsins. Vá hvað er gott að vera orðin eins og ég á að mér.

Kúkur

2006-07-18T18:48:00.000Z

Þá er ég loksins komin með nettengingu sem ræður við bloggfærslur...
Það er búið að vera áhugavert að vera í Keflavík undanfarið. Minningar úr barnæsku hafa komið upp í hugann. Um daginn gekk ég í gegnum skrúðgarðinn og var að velta fyrir mér hvað hann var miklu flottari og stærri í gamla daga, áður en hluti af honum var tekin undir viðbyggingu sjúkrahússins. Þá varð ljóslifandi minningin um að hafa kúkað á bak við runna sem voru þarna í einni brekkunni. Ég mundi líka hvað mér var rosalega mál að kúka þennan dag og hversu gott það var að sleppa við að gera í buxurnar. Svo mundi ég líka hversu flugurnar voru fljótar að koma sér fyrir á kúknum því ég hafði ekki vit á að krafsa yfir hann. Frumþarfirnar geta svo sannarlega verið eftirminnilegar.

Farvel København

2006-07-08T14:16:00.000Z

Þá er ég bara komin til Íslands!

Rómantík

2006-07-03T22:28:00.000Z

Kaupmannahöfn hefur svo sannarlega kosið að kveðja mig með mjúku faðmlagi og sætum kossum. Hver klukkustund er næstu yndislegri þessa dagana.
Ég man ekki lengur af hverju ég er að fara til Íslands... eftir of fáar klukkustundir og enn færri daga.